4 - Prières d'exorcisme extraites de Munich, Bayerische Staatsbibliothek, Clm 3909

(Fol. 250r) Exorcismus super energuminos. Oratio. Omnipotens sempiterne deus, a cuius facie caeli distillant, montes sicut cera liquescunt, terra tremit, cui patent abyssi, quem infernus pavescit, quem omnis terrarum orbis aspiciens humiliatur : te supplex deprecor, dominator domine, ut ad inuocationem sanctissimi nominis tui ab huius famuli tui vexatione inimicus confusus abscedat, et ab eius possessione anima liberata ad auctore suae salutis recurrat liberatoremque suo, diabolico fetore depulso et odore suauissimo spiritus sancti precepto, sequatur. Per.

(Fol. 250r) Super energumenum baptizatum Deus angelorum, deus archangelorum, deus prophetarum, deus apostolorum, deus martyrum, deus uirginum, deus pater domini nostri iesu christi, inuoco sanctum nomen tuum ac preclare maiestatis tuae clementiam supplex deposco ut mihi auxilium prestare digneris aduersus hunc nequissimum spirituum, ut ubicumque latet, audito nomini tuo, uelociter exiat et recedat.

(Fol. 250r) Exorcismus Ipse tibi imperat, diabole, qui ventus et mari et tempestatibus imperauit. Ipse tibi imperat qui te de superius celorum in inferiora terre demergi precepit. Audi ergo et time satanas, uictus a domine et prostratus, abscede in nomine domini nostri iesu christi. Tu ergo, nequissime satana, inimice fidei generis humani, mortis raptor, iustitiae declinator, malorum radix, fomes uitiorum, seductor hominum, perditor gentium, incitator inuidiae, origo auaritiae, causa discordiae, excitator dolorum, demonum magister, quid stas et resistis cum scias eum tuas perdere uires. Illum metuae qui in isahac immolatus est, in ioseph uenundatus in agno occissus.

Recede in nomine patris et filii et spiritus sancti, et da locum spiritui sancto per hoc signum sancte crucis christi domini nostri iesu christi qui uenturus est.

(Fol. 250r-250v) Item coniuratio. Deus, conditor et defensor generis humani, qui hominem ad imaginem et similitudinem tuam formasti respice super hunc famulum tuum N., qui dolis inuidi serpentis uexatur, quem uetus aduersarius et hostis antiquus acre formidinis horrore circumuolat et sensum mentis humane stupore defugit, terrore conturbat et metu trepidi timoris exagittat. Repelle timorem et uirtutem diaboli, fallacisque eius insidias, amove procul iniquus temptator aufugiat sit nominis tui signo famulus tuus signatus et animo totus et corpore. Tu pectoris eius in eterna custodias tu uiscera regas, tu corda confirmes ; in anima aduersarie potestatis temptamenta euanescant. Da ut qui usque huc terrebat, ille territus habeat et uictus abscedat ut seruus tuus corde confortatus mente sincera atque deuota possit te debitum semper probere famulatum.Per

(Fol. 250v) Pro infante a diabolo vexato Domine sancte pater omnipotens sempiterne deus, uirtuem tuam totis exoro gemitibus pro famuli tui N. istius a diabulo oppressa infantia. Qui etiam peccatoribus inter pressuras presidium, exurge pro huia infantia debellata et noli diu retinere uindictam, nec ante tuum conspectum ueniant delicta parentum qui nec pro filio patrem nec pro patre promisisti filium iudicari. Auxiliare quesumus huic famulo tuo N.inimici furore vexato, nec sine baptismate facias eius animam ab eo possideri, sed potius tenera aetas, maligni obpressionibus liberata, tibi referat gratias sempiternas. Per.

(Fol. 250v-251r) Unde supra. Oratio super energuminum Domine sancte pater omnipotens eterne deus osanna in excelsis, pater domini nostri iesu christi, qui illum refugam tyrannum gehenne deputasti, qui unigenitum tuum in mundum misisti ut illum rugientem leonem contereret, uelociter adtende accelera ut eripias hominem ad imaginem et similitudinem tuam creatum a ruina et demonio meridiano. Da domine terrorem tuum super bestiam qui exterminauit uineam tuam, da fiduciam seruis tuis contra fortissimum draconem fortiter stare, nec contempnat sperantes in te et dicat in pharaone iam dixit : "Deum non noui nec israel non dimitto". Vrgeat illum domine dextera tua potentissima discedere a famulo tuo N., ne diutius presumat captiuam tenere hominem, quem tu ad imaginem tuam facere dignatus es. Per

(Fol. 251r) Adjuratio Adiuro te ergo serpens antique, per iudicem uiuorum ac mortuorum, per factorem mundi, per creatorem omnium rerum, per patrem eternum et per unigenitum ihesum christum filium dominum nostrum ante sancta genitum et in sancto ex matre uirgine uerum hominem temporaliter natum et per spiritum sanctum ex patre et filio procedentem coeternum et consubstantia te

patri et filio qui trinus et unus uiuens per inmortalia sancta et regnans sine fine qui habet potestatem occidere et uiuificare perdere et saluare et mittere in gehennam per eum adiuro ut ab hoc famulo domini N. cum omni malicia tua et cum omni militia exercitus tui furoris sine mora discedas quia ipse tibi imperat. Adiuro te, non ex meam infirmitate sed per nomen eternum eisdem patris et filii et spiritus sancti ut exeas et recedas ab isto plasmate domini quem ipse ad imaginem suam fecit. [Cede, cede] non mihi sed misteriis christi. ipsius enim te perurget potestas, qui in ipsa carne quam sumpsit de uirgine matre pro totius mundi salute sua uoluntate passus et in cruce et mortuus [ ] et tercia die per descensionem inferni et post [ ] in principe tuo operatus et sua propera uirtute et potestate ipsa qua mortuus et carne resurrexit et quando uoluit in celum unde descendit per se et iam reuersus ascendit ubi ad externam sui patris sedet expectans resurrectionem mortuorum ad suorum salutationem [ ] et tuorum tecum interitum et eternam perditionem. Illius ergo brachium contremisce, illum fuge qui deuictis gemitibus inferni animas suorum ad lucem de qua tua inuidia (fol. 251v) suadente cecideri sua inmensa misericordia agente reduxit. Sit tibi terror hominis corpus. Sit tibi formido imago dei. Non resistas neque moreris discedere ab homine quo complacuit christo ut in homine habitaret. Et ne me infirmum contepnendum putes dum me pecatorem nimis et cognoscas. Imperat tibi deus pater, imperat tibi filius imperat tibi spiritus sanctus, imperat tibi deus unus in trinitate trinius in unitate. Imperat tibi sanctorum apostolorum. Imperat tibi sanguinea martyrum uictoria. Imperat tibi preciosa sanctorum confessorum indulgentia. Imperat tibi sanctarum castitas uirginum. Imperat tibisacramentum crucis. Imperat tibi sanctorum misteriorum uirtus. Exi transgressor, exi seductor, plene omni dolo et fallatia, ueritatis inimice, innocentium persecutor. Da locum, durissime, da loco impiissime, da locum christo in quo nihil inuenisti de operibus tuis, qui te expoliauit, qui regnum tuum destruxit, qui te uictum ligauit et uasa tua disrupit, qui te proiecit in tenebras exteriores, ubi tibi cum ministris tuis eternus erit preparatus interitus. Sed qui nunc, turbulente recogitas ? Quid, temerariae, retractas ? Reus omnipotenti deo cuius statuta transgressus es. Reus filio eius iesu christo quem temptare ausus es et crucifigere presumpsisti, reus humani generis cui mors tuis persuasionis venit. Adiuro ergo te, draco nequissime, in nomine agni inmaculati qui ambulauit super aspidem et basiliscum, qui conculcauit leonem et draconem, ut discedas ab homine isto, discedas ab ecclesia dei. Contremisce et effuge, inuocato nomine illius quem inferni tremunt cui uirtutes celorum et potestates et dominationes subiecte sunt, quem cherubin et syraphyn indefensis uocibus laudant. Imperat tibi uerbum caro factum, imperat tibi natus ex maria uirgine, imperat tibi iesus christus nazarenus qui te cum discipulos eius condempneres et heliseum prostratum exire iussit ab homine. Quo presente, cum ab homine separassit, nec porcorum gregem presumebas contingere. Recede ergo nunc adiuratus in nomine eius ab homine (fol. 252r) quem ipse plasmauit. Durum est tibi chisto uelle resistere. Durum est tibi contra famulum calcitare. Quia quanto tardius exis tanto tibi supplicium maius crescit ne hominem contempnis sed illum qui dominatur uiuorum et mortuorum est, qui uenturus est iudicare seculum per ignem.

Item coniuratio super vexatos a demonio.Coniuro et obtestor te, diabole, maledicte per nomen domini nostri iesu christi et imperium eius et per virtutem sancte trinitatis et omnipotentiae eius, ut exeas, tu et omnis diabolica potestas de homine isto, absque lesione corporis et anime. Exi omnino, per uitricem manum eius qui homine plasmauit, nec stare, nec discurrere, nec latere presumas in istius hominus corpore aut uestimento presumas sed profugus abscede nullumque vestigii tue antique malitie aut doloris in eo derelinquas. Exi, iniquissime et spurcissime quicumque sis et qualecumque nomen tibi sit. Exi velociter per ineffabile sacramentum nominus eius qui cuncta creauit et qui hominem plasmauit atque redemit quem te in honore sumo positus per superbia et inobedentiam contempsisti et pro tuum lapsum hominem ab eo plasmatum inuidia ductus perventum lignum peccaredi preceptum preuaricando fecisti. Exi uelociter ab isto homine quia ipse deus sibi hominem elegit ut habitet in eo. Exi de capite eius, de capillis illius, de vertice, de fronte, de superciliis, de oculis, de temporibus, de auribus, de naribus, de ossibus, de carne, nec presumas in ullo loco corporis eius remanere, nec latere sed sine mora exi quia ipse tibi precepit cuius regnum et imperium sine permanet in sancta sanctorum. Amen.

Alia. Adiuro ergo te, maledicte Satana, per Deum altissimum qui fecit celum et terra, mare et omnia que meis ne famulum domini dolis tuis ultra nocere aut temptare presumas neque aliquam ei uiolentiam amplius inferas. Contremisce et fuge, inmundissime spiritus, principium doloris, malorumque omnium radix, transgressor veritatis, preuaricator, totius iustitiae persecutor bonorum, doctor fornicationis, parricidii (fol. 252v) magister, dissipator pacis, semen pessimum, dux tenebrarum, auctor mortis, inuentor sceleris, ianua inferni, omnium denique criminum causa. Separa te a famulo domini sancti, sic separavit Deus omnipotens celum a terram, mortem a vitam, lucem a tenebris. Sic separa te, maledicte satana, ab homine isto N, et da locum spiritui sancto ut ipse habitet in eo. Qui ex patre et filio procedit unus dominus uiuens et regnans per inmortalia sancta sanctorum. Amen

Secundum Lucam (9, 1-4) : Conuocatis autem duodecim discipulis suis, dedit illis uirtutem et potestatem super omnia demonia et ut languores curarent. Et misit illos predicare regnum domini et sanare infirmos et ait ad illos nihil tuleritis in via neque uirgam, neque peram, neque pane, neque pecuniam, neque duas tunicas habeatis.Et in quamcumque domum intraueritis ibi manete et inde ne exeatis.

Secundum Lucam (10, 19-20) : Ecce dedi uobis potestatem calcandi super serpentes et scorpiones et super omnem uirtutem inimici et nihil uos nocebit uerumtamen in hoc nolite gaudere quia spiritus uobis subiciuntur gaudete autem quod nomina uestra scripta sunt in caelis.

Secundum Lucam (11, 24-26) : Cum inmundus spiritus exierit ab homine, ambulat per loca inaquosa querens requiem et non inueniens dicit : "Reuertar in domum meam unde exiui". Et cum uenerit, inuenit scopis mundatam et ornatam et tunc uadit et adsumit septem alios spiritus nequiores se et ingressi habitant ibi et sunt nouissima hominis illius peiora prioribus.

Unde supra. Adiuratio. Adgredior te, inmundissime spiritus, damnate atque damnande, te increpans et adiurans per inuocationem sanctissimi nominis domini nostri iesu christi et per incarnationem eius et passionem et per mirabilem eius ascensionem in celos et per adventum spiritus sancti paraclyti et per eius distictum iudicium in quo dapnandus es cum omnibus iniquis in eternum supplicium sine fine cruciandus et peripsam crucem in qua ipse iesus christus filius ilius uiui suo proprio sanguine deleuit peccata mundi et ipse hominem per se ad suam imaginem plasmatum et per te et principem tuum sola inuidia tue malitie deprauatum atque corruptum redemit ut inquamcumque parte corporis hominis istius lateas te amplius occultare et celare non audeas. Sed tua propria professione confusus manifestare te non desinas et ita adiuratus a nobis atque ad domino nostro dampnatis et iussus sine mora exeas et recedas ab homine isto nec amplius habeas potestatem illum inquietare et illudere ac templum domini repetendo intrare aut aliqua fantasia tue inmense malitie ultra uiolare. Hoc tibi fit interdictum per eundem dominum nostrum iesum christum filium domini uiui qui uiuit et regnat cum domino patre suo in unitate spiritus sancti trinus et unus uerus et sempiternus dominus permanens in sancta sanctorum. Amen. Ecce cruce domini fugite p.

Deinde benedictiones quascumque uelis impones super egrum salua fide et firma spe in dominum uerum et saluus erit homo qui uexatus fuerat a diabolo.