Pierre Reynoard quant au contrerolle, il trouveroit bon de l’abatre et faire délaisser par quelque bon moyen que pourroit comme l’en dit que font ou se perforcent faire ceulx d’Orléans et autres villes de ce royaume.

Quant aux entrées, il ne scet qu’en dire à cause de ce que les estrangers seront fort chargez et porteroit grant dommaige aux foires et est demeuré en son oppinion de ceste matière neutre.

Loys Taillemond quant au contrerolle le treuve grant charge à la ville mays si le roy le veult et qu’on n’y puisse obvier ne scet qu’en dire et qu’il fauldra faire comme les autres villes.

Quant aux entrées, il se treuve perplex par les raisons dictes par Messieurs qui ont parlé par devant luy, touteffoys il s’est résolu que lesdites entrées bien esgalles seroit bonne chose et qu’on doit mectre sus le vin comme sur les autres entrées veu que le vin paye grant gabelle.

Humbert Mathieu est d’oppinion qu’on doit remontrer la grant charge que sera au peuple par la création dudit contreroleur et savoir comme font les autres villes de ce royaume et se renger avec eulx.

Touchant de mectre sur les entrées et discontinuer les gabelles, dit que souvent en a esté parlé et discuté en l’ostel commun et entre les habitans de ladite ville, mays tout considéré combien qu’il treuve bien estrange de charger les marchands estrangers venans en ceste ville, néanmoings est d’oppinion que bon seroit mectre lesdites entrées bien esgalles sur toutes denrées sans en exemptées une et sur icelles payer les gabelles.

Ame Bullioud touchant le contrerolle dit qu’on doit faire comme les autres bonnes villes de ce royaume.

Touchant les entrées, luy semble qu’on doit le communiquer aux gens d’esglise et autres à qui il touche.

Guillaume Andrevet qu’on face du contrerolle au mieulx qu’on pourra.

Touchant les entrées, il ne treuve pas bon ains est d’oppinion de vivre à la manière acoustumée.

Jacques Buyer qu’on doit faire touchant le contrerolle le mieulx qu’on pourra.

Touchant les entrées, est d’oppinion de vivre à la manière acoustumée sans mectre lesdites entrées.

Jacques Paulin touchant le contrerolle qu’on face les remontrances nécessaires et faire comme les autres villes de ce royaume.

Touchant les entrées, considérant les empeschementz qui en porroit advenir tant par les gens d’esglise que par les marchands estrangers et il n’est pas d’oppinion de les poursuyvre ains vivre à la manière acoustumée.

Maistre Jehan Bardin touchant ledit contrerolle treuve bien estrange qu’on le puisse abatre veu qu’il a esté créé par édict, néanmoingtz qu’on doit faire comme les autres bonnes villes de ce royaume et ne treuve à propos que la ville le prene à sa main parce qu’il seroit mieulx que ung particulier ait ledit office que le corps de la ville.

Touchant lesdites entrées, il a esté autreffois d’oppinion qu’elles seroient bonnes mays considérant plusieurs raisons dictes et le dommaige que se seroit aux foires, il luy semble que l’en doit vivre comme l’en a acoustumé si s’estoit si grant dommaige ausdites foires.

Maistre Jehan Bonyere que ne pourra abollir ledit contrerolle qu’on doit accepter l’offre faicte par ledit Anthoine Grollier.

Tant qu’il touche les entrées, il craint bien le dommaige que ce sera ausdites foires mays néanmoingtz que les pourra mectre sus qu’on le face.

Jehan Faye touchant le contrerolle qu’on en face au mieulx qu’on pourra et luy semble que le suyvra bien l’en le fera bien abollir ou sinon accepter l’offre dudit Grollier affin de la remectre es mains de ladite ville.

Touchant les entrées, pour le soulaigement du povre peuple luy semble qu’elles seront très bonnes et prouffitables en laissant la cueillie desdites aides parce que les habitans en seroit tropt mieulx soulagez et pour obvier à ce que les gabelles ne soient mises hors des mains de ladite ville de quoy aucuns particuliers comme l’en dit font grant instance de les avoir et lever après à la rigueur et pour autres raisons treuve bonnes lesdites entrées excepté sur le blé et le vin.

François Martin touchant le contrerolle qu’on doit faire comme les autres bonnes villes autrement prendre l’offre dudit Grollier.

Touchant des entrées, treuveroit bon oster les gabelles, mays de charger par entrées les autres marchandises il treuve pas bon mays fort dommageable aux foires parquoy ne dit ouy ne nenny et depuis s’est résolu et dit qu’il n’est d’oppinion de les mectre sus.

Benoist Rocheffort quant au contrerolle luy semble qu’on se doit renger comme les autres bonnes villes.

Touchant les entrées, doubtant l’abollicion des foires et que les marchands s’en dolosent, il n’est pas d’oppinion de les mectre mays que les porroit mectre que chacun fut content il seroit bon.

Jheromme Garnier que ne pourra abollir ledit contrerolle qu’on doit tacher de le réduyre à la main de la ville.

Touchant lesdites entrées, il en a ouy parler à plusieurs marchands estrangiers qui ne le permetront ains y obvieront à tout leur pouvoir, néanmoingts que le pourra faire il le treuve bon.

Thomas Le Maistre qu’on doit tacher de abatre ledit contrerolle que pourra et à toute dilligence ou sinon le réduyre à la main de la ville.

Touchant les entrées, considérant que ce seroit la totalle perdicion des foires et prosequement de ladite ville, il n’est d’oppinion de les mectre ains totallement s’y opposer.

Anthoine Chastel tant qu’il touche le contrerolle comme les précédents.

Touchant les entrées, dit qu’elles seront bien esgallées et gracieuses de sorte que chacun en sera plus content que de par les gabelles et les treuve bonnes.

Maistre Philibert Muret tant qu’il touche ledit office dit que le Roy a créé ledit office et autres contrerolles de ce royaume de son propre vouloir sans avoyr ouy ne actendu l’interest et dommaige des habitans ne de ceulx à qui il touche, parquoy on ne le doit permectre ains se opposer et le plaider fermement.

Touchant les entrées, il treuve bonne chose de abollir ou discontinuer la lieve et cueillie des aides et gabelles car les povres gens et habitans de ladite villle en seroient fort sollaigez, est d’oppinion qu’on mecte lesdites entrées pourveu qu’on ne mecte riens sur les choses mengeables que sera cause que les gens d’esglise y consentiront.

Jehan Gautier touchant le contrerolle dit que de le réduyre à la main de la ville il n’y treuve raison ains villa non potest tenere officium regale, parquoy s’il a follement achapter ledit office son dommaige parce que s’il entende contreroler le Xe du vin et le barrage, il et les autres ses consortz artizans se opposeront et les garderont bien.

Touchant les entrées, il n’est d’oppinion de les mectre sus ains vivre comme l’en a acoustumé et néanmoings dit qu’il baillera son oppinion par escript et ne veult que le secrétaire du présent consulat escripve sadite opinion, néanmoingtz par ordonnance de mesdits sires les conseillers et assistans ont ordonnné icellle estre escripte par le secrétaire.

Anthoine Saineton touchant le contrerole dit comme les précédents.

Touchant les entrées, il n’est d’oppinion de les mectre sus ains vivre comme l’en a acoustumé craignant la perdicion des foires et deschassement des marchands.

Claude Regnaud touchant le contrerolle comme les précédents.

Touchant les entrées, il n’est pas de ceste oppinion ains vivre comme l’en a acoustumé parce que ce seroit la totale perdicion des foires de la ville.

Guillaume Juge touchant le contrerolle qu’on abollir et rendre plustost l’argent qu’il en a baillé.

Touchant les entrées, il n’est pas d’oppinion qu’on les mecte sus.

Ambroize Rolland touchant le contrerolle idem.

Touchant les entrées, il les treuve bonnes en abatant les gabelles ;

Gabriel de Rossi qu’on laisse ledit contrerolle parce que s’il y a contreroler à bonne heure et s’il n’y a riens son dommaige.

Touchant les entrées, il ne les treuve bonnes ains fort dommageables et de perdicion de la ville et des foires.

Ambroise Ferrier que l’en le doit abollir que pourra.

Touchant les entrées, il ne treuve bon qu’on les mecte en temps de foire.

Jehan Vimain dit comme a dit Jehan Faye.

Anthoine Goiet qu’on ne doit mectre lesdites entrées.

Benoist de la Vannele qu’on ne les doit mectre.

Claude Chimier idem.

Guillaume Sallamon idem.

Girard Saget comme les autres villes tant qu’il touche le contrerole.

Touchant les entrées, il a esté autreffois d’oppinion de les mectre mays après avoir ouy les raisons cy alléguées il ne consent poins qu’elles soient mises.

Pierre Boisson qu’on réduyse le contrerolle à la main de la ville que pourra.

Touchant les entrées, il s’en remect à la discretion de messieurs.

Jacques Pinet dit comme Pierre Boisson.

Symon Cheblin idem.

Lancellot Vizaton idem.

Anthoine Tourteron qu’on ne mecte poins d’entrées et vivre comme l’en a acoustumé.

Jehan Grimod dit comme Maistre Bardin.

Gabriel Roux dit comme le sire Jehan Faie et s’en remect à son oppinion.

Bertrand Defer s’en remect à l’oppinion dudit Jehan Faye.

Pierre Fournier receveur qui est survenu est d’oppinion tant qu’il touche le contrerolle qu’il n’est besoing contreroller car il n’y a pas grant deniers commis et quant aus deniers octroyez par le Roy il convient en rendre compte an par an et ainsi n’est besoing permectre ledit contrerolleur.

Touchant lesdites entrées, il treuve bon de les mectre en foire et hors foire que pourra.

Et sur ce, à cause de la diversité des oppinions, n’y a esté aucune chose pour le présent conclus ».