2. Transcription

Cy sou signent lo chouses qui ont estés admises par monsieur Benoit Mareschal, monsieur de la Bergniens, baillis de Bresse, par monsieur Humbert Mareschaut, messieurs Loys Francoys, Loys de Valperge, par Johan de Chavanes, Johan de Lornay et plusieurs autres seigneurs et gentilshommes, à ce requis touchant le fait de la fortiffication dou chastel viel, palays et ville de Monluel.

Premièrement est ordonné de recursier la ville de Monluel doupuis tendens au terrain derrier la mayson des hers de Hugonin Cabrelion, laquelle murallie doit fere la ville ansamble la porte du dit mur neccessere et les tours appartenans.

Item maix est ordonné que la dicte ville soit tenue de fere sur la porte d'Escorchia une bonne tour suffisant et, doupuys icelle porte jusques es terrainx dou palays par dedans la ville, ung autre mur et que entre chacun de ces doux murs l'on comble de terre tellement que l'on puysse venire par la dicte porte au dit palays.

Item plus est admise de fere une glassoys tout autoure de la mote de la tour ronde et sera mys en deffensa et fornys de canonieres en manyere que le dit glassoys et la dicte tour seront mestre de toute la mote dou dit viel chastel ; et dou dit glassoys sera pris ung mur qui sera en deffensa dehors et dedans ira férir en la tour aut dit mur de la ville (...) sera.

Item est ordonné que soit pris ung autre mur au dit glassoys qui ira férir aut pré de la tour dou palay et sera mys à deffensa dehors et dedans et en celluy mur serons feictes doux tours et en chescoune ung pont leveys, pour lever et bayssier quant neccessere sera dou dit palays et pour aler et venir dou dit viel chastel au palays.

Item est ordonné que soient repparellier lé vieillies muraillies qui sont a dit chastel viel et myses a deffensa et demouront en biez tout en tour de la grande mocte dou dit viel chastel, laquelles fortiffications la ville fait fere la dicte porte d'Escorchia ansamble lo mur qui se fera doupuis icelle porte jusques au terrainx dou palays ansamble (...) de la porte et tours neccessaires qui sont ordonne de fere doupuys la murailles vellie dou chastel viel, jusque au derrier la mayson dou dit Hugonin Cabrelion.

Item est ordonné que monsieur face fere a ses despens et missions ledit glassoys ansamble lo mur qui se fera doupuy le glassoy jusque a la tour dou palays, ansamble lé tours et les pons leveys desus ordonnés a fere et aussy reparellier les murs vieulx dou dit chastel viel.

Item est plus admise et ordonné de fere fossés bons et souffisant pour dehors, doupuys le palays de la mocte dou dit vel chastell, jusques là où est la muraillie nouve de la dicte retraicte se commencera.

Et en ce faisant la dicte ville se retant de XIIII dizeniers et se met en faicte et pareillement ledit viel chastel et palays domouront maistres de ladicte ville et pourra l'on entrer et sallir.